كشف الحسيني سمير، لاعب نادي الزمالك السابق، مساء اليوم الثلاثاء، أسباب خسارة نادي الزمالك أمام غريمه الأزلي النادي الأهلي بنتيجة 110-61، في إطار منافسات الدور نصف النهائي، من مسابقة دوري السوبر المصري لكرة السلة 2025.

بتلك النتيجة تأهل النادي الأهلي لكرة السلة إلى الدور النهائي من المسابقة المحلية، ليضرب موعدًا مع نادي الاتحاد السكندري الفائز على نظيره سبورتنج بنتيجة 3-1.

الحسيني سمير يكشف أسباب خسارة سلة الزمالك أمام الأهلي.. ويؤكد: لازم نصارح الجماهير

وأضاف: «هناك أزمات مادية في نادي الزمالك في عهد المجلس الحالي، وبالتحديد من عدم تسديد المستحقات المالية في مواعيدها، مما أدى إلى لصعوبة ضم لاعبين سوبر، بسبب تخوفهم من الحصول على المستحقات كاملة، بالإضافة إلى إن المتاح ليس بالأفضل».

وتابع: «وأيضًا عدم الاستقرار الفني، من بداية الموسم، أدى إلى تذبذب فني واضح داخل الملعب، عملنا مباراة قوية في البداية، ثم أداء سيء في اللقاء الثاني والثالث، ومواجهة رابعة رائعة، لكن اليوم هل ده إجهاد على اللاعبين، وبخاصة بأنك لا تمتلك جودة لاعبين قادرة على تحمل خوض مباراتين في يومين، مثل جاهزية ودوافع الأهلي».

كما أكمل: «الأهلي عنده استقرار فني ومالي وإداري، وده سبب النجاح على النقيض في نادي الزمالك، لازم تكون صريح، وتعمل هيكلة من أول وجديد، لازم صراحة من الجماهير».

وواصل: «عندنا أزمات مالية متلاحقة، تبعدنا عن المنافسة رغم التأهل إلى المربع الذهبي، لكن هذا ليس مقبول على اسم نادي الزمالك».

وأردف: «عندنا هلاك في قطاعات الناشئين بشكل غير طبيعي، ومفيش حد عنده 18 أو 20 سنة يقدر يصعد للدرجة الأولى، لازم يكون في كشافين ومقابل ضخم، للتعاقد مع لاعبين مميزين، للعودة إلى المنصات، لإن نتائج قطاع الناشئين ليست جيدة، الجماهير عايزاك تشتري لاعبين، مفيش غير 5 لاعبين سوبر في مصر، ولديهم عقود سارية مع أنديتهم لـ 4 أعوام مقبلة، فميقدرش يفسخ تعاقده علشان ينضم لنادي الزمالك».

وزاد: «منقدرش نرجع أنس أسامة، لإنه بيتحصل على رقم وقدره من الاتحاد السكندري، فمفيش مبرر إنه يرجع، وإزاي نجيب لاعب مصري محترف خارح مصر، بيتحصل على أكثر من 5000 دولار، هتجيبه بكام، وكمان أجواء الدوري المصري مش زي أوروبا وشرق آسيا، هنا الصالات خالية من الجماهير، ولا توجد بها عدالة تحكيمية، عاصم مرعي متألق في كوريا، وعامل إنجازات وراتبه عالي، وأرقامه مذهلة، إزاي أقدر أقنعه يرجع الزمالك حتى لو بيعشقه، مستقبله في الخارج أفضل بالتأكيد».

وشدد: «يجب على مسؤولي نادي الزمالك مراجعة ما يحدث، ولازم الصراحة، اهتم بقطاع الناشئين، وسيبك من الكرسي والمصلحة الانتخابية، دور على إعادة نادي الزمالك لمنصات التتويج، أكيد في مصر ناس نفسها تلعب في النادي، لكن فين الكشافين، وجهاز فني عارف تاريخ وإنجازات الفريق، بالإضافة إلى صرف المرتبات للمدربين في مواعيدها يعني شهر بشهر، مش كل 3 شهور، ولازم يكون الجهاز الفني عنده صلاحيات، والأجنبي جاي يدرب ولا هيعمل خطة مستقبلية».

وأوضح: «انت كدة بتضحك على نفسك وجمهورك، انت مش هتقدر تنافس بالشكل ده، فهم الجمهور علشان يدعمك، لكن كل موسم تعشم الجمهور وفي أرض الواقع لا تحقق بطولات، المباريات المتلاحقة أظهرت ذلك، نتيجة انهاردة فضيحة وكارثة ده فارق 49 نقطة، دي مهزلة ولابد من محاسبة المسؤولين عليها، مينفعش أخسر بالفارق ده، كنت بعت فريق الشباب أحسن».

بينما بين الحسيني سمير: «دكة الأهلي اليوم مشجعين درجة ثالثة للنادي، ويهمهم يحققوا إنجاز متحققش وهما لاعبين، واستغل الفرصة انهاردة، الموضوع محتاج صراحة ووضح، اعمل خطة لمدة عامين، وقول أنا هعمل ثورة داخل القطاعات، لكن هناك مجاملات، وبفكر مسؤولي نادي الزمالك إن مفيش مسؤول في الزمالك أو الأهلي أو الاتحاد السكندري كان عضو عامل قبل كدة، الناس دي بقيت كدة بتاريخها وإنجازاتها، متدورش على العضو العامل فقط، لازم يكون متميز، بلاش عمولات ومجاملات، لازم يكون يصلح للمنصب».

فيما أتم: «الانتخابات مش كل حاجة، هات مدرب قوي الشخصية، لو فكرنا صح هنرجع تاني للمنصات في كل الألعاب، في ناس تتمنى تمر بجوار سور نادي الزمالك، رجع تاني الكشافين، وانت لست صاحب مال علشان تشتري، ولابد من الصراحة مع الجمهور، علشان كل موسم هيحصل نفس القصة، هتكسب في الأول الأندية الأضعف، ثم هتخسر من المنافس التقليدي زي الأهلي والاتحاد السكندري، في لاعيبة بتيجي الزمالك علشان العقد الخيالي وهي مش سوبر للأسف».

الحسيني سمير – صورة أرشيفية