علق إبراهيم المنيسي، رئيس تحرير مجلة الأهلي، ومقدم برنامج ملك وكتابة على قناة الأهلي، على تصريح خالد الغندور الأخير، بشأن عرض التفاصيل المالية لرحيل وسام أبوعلي، مهاجم الأحمر، إلى النادي الكولومبي.
وقال المنيسي في فيديو بثه عبر صفحته الرسمية على موقع «يوتيوب»: «من حيث المبدأ أنا أوافقك لكن بإمارة إيه تتحدث عن الشفافية، يبقى كويس أوي لما تتطالب إعلاميًا إن الأرقام تبقى معلنة، ولكن هل سألت نفسك مصطفى شلبي جه بكام واتباع بكام؟!.. مصطفى شلبي اللي قولتوا عليه أحسن من رمضان صبحي، وميدو قال عليه إنه أحسن ونج شمال في مصر، وإنه مش محتاجين رمضان صبحي لأن شلبي أحسن منه».
أضاف: «أيضًا الجفالي قالوا إن في مظاهرات اتعملت لما راحوا يجبوه علشان الناس مش عايزه تسيبه، طب الناس دي جت بكام وهتمشي بكام؟».
وأتم: «الإعلام من حقه يسأل الأهلي والزمالك وكل الأندية، لكن فكرة الأهلي بس المطلوب منه اللي يعلن ويعرف الناس كل أرقامه وميزانيته، طب ينفع تبص حواليك وتسأل السؤال ده تاني».
وكان خالد الغندور نجم الزمالك السابق، أثار الجدل بعدما كتب عبر حسابه الرسمي على موقع التواصل الاجتماعي «فيس بوك»: «يجب على النادي الأهلي الإعلان الرسمي عن ثمن بيع وسام أبوعلي واللي هيتم وضعه في الميزانية وعن المبلغ اللي هيحصل عليه ناديه السابق من الصفقة بعيدًا عن الكلام المرسل على مواقع التواصل الاجتماعي وكل واحد بيضرب الرقم اللي يعجبه».
