شن أحمد سالم المتحدث الرسمي لـ نادي الزمالك، هجومًا حادًا على الإعلامي أحمد شوبير، في أعقاب حديث الأخير ببرنامجه على قناة الأهلي عن نادي الزمالك، وأخباره.
وقال أحمد سالم في تصريحات عبر برنامجه المذاع على شاشة قناة الشمس: «شوبير داخل في خناقة مع محمد عمارة بسبب كلامه عن أزمات أوضة اللبس في الأهلي، وبتقول إن مينفعش ولاد النادي يعملوا كدة، هتاخد إجراءات قانونية، وده حقك طبعًا وملناش فيه، لكن طول النهار بتتكلم عن مروان عطية عايز فلوس، ووسام أبو علي عايز يمشي، وغيره وغيره، عادي؟! .. إيه حكاية الحجر على آراء الآخرين، إن كل حد يقول رأيه يبقى ضد النادي؟ وإيه الزج باسم الزمالك في كل حاجة؟!».
وأضاف: «مترد على كابتن مصطفى يونس واللي بيقوله، ولو أساء للنادي أعملوا قضية وخدوا إجراءتهم لو لم يسيء حققوا في الموضوع، ولكن ميبقاش الشغل الشاغل تلقيح على الزمالك، نروح أمريكا نلقح على الزمالك، منقولش إحنا خسرنا، لأ، نقول الزمالك مراحش».
وتابع: «كل المشاكل اللي عندكوا سايبينها، ولاعب عايز يمشي عشان يلعب أساسي.. أنا مالي كزمالك؟ ليه يتحط اسم الزمالك في الحكاية؟ نفس الإعلاميين اللي بيهاجموا الزمالك، لما نفس الحاجة تحصل في الأهلي، بيدافعوا عنه، حتى لو في قنوات المفروض تبقى محايدة».
وأختتم أحمد سالم تصريحاته قائلًا: «يعني مثلًا، زيزو مشى من الزمالك وما التزمش، عادي. لكن وسام ما يلتزمش في الأهلي، يبقى خيانة وكارثة ونهاجمه ليه؟ بس هو ده اللي بيحصل. نفس الفعل، رد الفعل بيختلف حسب النادي للاسف».
