هاجم أحمد سالم المتحدث الرسمي لـ نادي الزمالك، الإعلامي أحمد شوبير، بعد تصريح الأخير بأن أحمد عبدالقادر لاعب الأهلي اتفق مع مسؤولي الأبيض للانضمام إلى الفريق الكروي.
وقال أحمد سالم في تصريحات عبر برنامجه المذاع على شاشة قناة الشمس: «كابتن أحمد شوبير اتكلم النهارده أو إمبارح، أو هو أصلًا كل يوم عنده برنامج بيتكلم ..أنا دايمًا بقول إن اللي بيني وبين كابتن شوبير كل خير، والاختلاف في الرأي لا يفسد للود قضية».
وأضاف: «لكن فجأة لقيت كابتن شوبير بيتكلم عن أحمد عبد القادر وبيقول إنه قعد مع مسؤول من الزمالك، وإن ده مش احتراف، ولازم لو عايز تمشي تقول، وإن لو كانت دي حصلت في الأهلي كانت الدنيا قامت».
وأضاف: «أنا بس مش فاهم، ليه دايمًا الزمالك لازم يدخل في جملة مفيدة؟ حضرتك عندك دلوقتي مشاكل كتير، ما تتكلم عنها بدل ما تحشر الزمالك في كل حاجة .. هو عدم وجود أخبار من الزمالك عامل قلق؟ هو القفلة اللي عاملها الزمالك مضايقاكوا للدرجة دي؟».
وتابع: «ولو على التفاوض أثناء العقود، ما معتز إينو طلع قال إنه قبض فلوس من رئيس الأهلي الحالي وقتها وهو لسه فاضله سنة ونص في عقده، مين علق؟ ولا حد .. ليه يا كابتن شوبير معلقتش على كلام إينو؟ يا ترفعوا قضية على معتز إينو لأنه أساء للأهلي، يا تقولوا حصل وخلاص، وساعتها يبقى طبيعي إن التفاوض بيحصل حتى لو في نص العقد».
