عبر ربيع ياسين نجم الأهلي ومنتخب مصر السابق، عن غضبه لما وصل له الوضع بالكرة المصرية، مشيرا إلى أنه من اللازم محاسبة كل مسؤول بكل هيئة رياضية، من أجل الارتقاء بالمنظومة.
وقال ربيع ياسين في تصريحات إعلامية عبر شاشة «الشمس»: «الأزمة حاليا إن انت دلوقتي بتدور على الشخصيات اللي تعيش وتقول حاضر ونعم وبس، إنما أنا هتحدى أي حد في مصر إن دلوقتي موجود مسؤول ومعاه لجنة ولا معاه تشكيل أي حاجة، يكونوا بيقولوا رأيهم وبيتكلموا وبيفرضوا شخصيتهم الفنية وشخصيتهم الإدارية».
واستكمل: «ليه صعب جدا؟ كله محافظ على الكرسي، كله محافظ على مكانه. الكابتن صالح سليم أدى فرصة لكله، اختار محمود الجوهري، اختار طارق سليم، اختار طه إسماعيل، منح فرصة للجميع، أدى فرصة للكل وبدون التدخل في شغلهم».
وتابع: «انت النهاردة بتتكلم على لجان وعلى أي واحد مسؤول على كرسي النهاردة موجود في حتة في نادي أو اتحاد مفروض يطلع كل شهر يقول أنا عملت كذا، أنا إنتاجي كذا، أنا سلبياتي كذا، أنا إيجابياتي كذا، أنا صرفت، أنا عملت. إنما كل واحد بيقول لك أنا حر، أنا أعمل اللي أنا عاوزه ومفيش حد بيناقشه، مفيش حد بيتكلم عليه خالص، مفيش حد والسياسة النهاردة بقت سياسة الفرد، مش سياسة الجماعة فهو ده من هنا كل الأزمة».
