كشف وائل القباني، مدير الكرة السابق بنادي الزمالك، عن سر خلال فترة توليه منصبه بالقلعة البيضاء، ورفضه منح ثلاثي الفريق عبدالله السعيد ومحمود حمدي الونش ومحمد شحاتة نسب من عقودهم.
وقال وائل القباني خلال حلوله ضيفًا على برنامج الكابتن المذاع على شاشة «dmc»: «مجلس إدارة نادي الزمالك برئاسة حسين لبيب، أوجد 15 مليون جنيه وقالي وزعهم زي مانت عايز، وأدي جزء من عقود اللاعبين».
وأضاف: «رغم إن المبلغ مش كبير بالنسبة للمستحقات المفترض تسديدها، إلا أن لم يحدث أزمة ومحدش حس بحاجة، عشان حطيت مستحقات الجهاز الفني لإن كان في ناس ليهم فلوس، وحطيت شهرين بدل سكن للاعبين المغتربين، وأديت مستحقات عاملي المهام بنادي الزمالك من مكافأة كأس مصر».
وتابع: «طلعت كمان فلوس سفرية أحمد حمدي والمثلوثي لتلقي العلاج، اتبقى بعدها 12 مليون وزعتهم على اللعيبة كعقود بالتساوي، ولكن باستثناء الثلاثي الونش وعبدالله السعيد ومحمد شحاتة لإنهم كانوا واخدين أكتر من 75% من نسبة عقودهم عكس الباقي واخدين 70% حد أقصى».
وأوضح: «العدالة هي اللي خلتني أعمل كدة واتكلمت مع محمد شحاتة والونش وكانوا مرحبين، لكن عبدالله السعيد مجاش اتكلم معايا أساسًا لإنه محترم».
واختتم: «طلعت فلوس للاعبي الزمالك اللي كانوا خارج قائمة نهائي كأس مصر، على الرغم من أن لو حد تاني كان قال المهم اللي هيلعبوا المباراة، حتى اللعيبة استغربت وقالت لي «إية ده انت طلعتلنا فلوس!» قولتهم (أة ده حقكم)».
