وجه خالد الغندور نجم نادي الزمالك السابق، رسالة لـ محمد شريف لاعب النادي الأهلي، بعد إعلان انضمامه للقلعة الحمراء، مشيرًا إلى أن معلوماتي تفيد بأن نادي الزمالك لم يفاوض شريف حسب ما تردد.
وكان محمد شريف، أعلن في تصريح تليفزيوني انتقاله إلى النادي الأهلي بشكل رسمي، خلال سوق الانتقالات الصيفية الجارية، مؤكدًا أنه فضل الانضمام إلى النادي الأهلي في الفترة المقبلة، ووقع على عقود انضمامه إلى النادي الأهلي لمدة 5 أعوام.
وقال خالد الغندور في فيديو بثه عبر حسابه الرسمي على موقع التواصل الاجتماعي «فيس بوك»: «ألف مبروك لـ محمد شريف على انضمامه للنادي الأهلي، عايز أقوله كلمة في ودنه، اختيار سليم يا محمد إن انت صبرت عشان ترجع ناديك اللي عمل اسمك وكبرك وخلى الناس تعرفك، وخلاك تعرف تركب عربية كويسة، وتروح منتخب مصر وتعمل تاريخ من البطولات».
وأضاف: «الفترة اللي فاتت كان عندك مشاكل مع نادي الخليج، بسبب إصاباتك الكتيرة بعدت عن منتخب مصر، وبالتالي كان لازم ترجع».
وتابع الغندور: «بعد نهاية عقدك وأصبحت لاعب حر، كانت أندية كتير عيزاك في مصر وخارج مصر، وكان ممكن تاخد فلوس كويسة جدًا لكنك فضلت الأهلي».
وأكمل: «لحد علمي معرفش موضوع الزمالك صح ولا لأ، بس معلوماتي لأ الزمالك مكنش عايزك بس مش دي القصة، لو الزمالك كان عايزك والأهلي رفضك كنت أكيد هتروح الزمالك».
وأوضح الغندور: «لازم نشجع اللعيبة اللي عندها ولاء لناديها ولتاريخها اللي عملته مع النادي، اللاعب مبصش أوي للفلوس ولكن بص للنادي اللي صنع اسمه».
واختتم نجم الزمالك السابق تصريحاته قائلًا: «محمد شريف راح الأهلي وهو عارف أنه مش ضامن مكانه كلاعب أساسي في الأهلي، لكن ممكن تحاول وتعافر، وانت قادر على حجز مكانك في الأهلي عشان لعيب مميز وعندك القدرة التهديفية».
