رد جمال عبدالحميد، عضو مجلس إدارة نادي الزمالك السابق، على شائعات ترك خزانة القلعة البيضاء خالية قبل رحيل المجلس السابق برئاسة مرتضى منصور.
وقال جمال عبدالحميد في تصريح تليفزيوني عبر شاشة «أون»: «الكلام ده مش أول مرة أسمعه ولكنه غير صحيح، والدليل على كدة أن ممدوح عباس حجز على الخزانة، هل في حد هيحجز على خزانة فاضية؟».
وأضاف مسؤول الزمالك السابق: «الكلام ده دايمًا بنسمعه لما مجلس جديد يجي، ويتهم المجلس السابق إنه ترك الخزانة فاضية، حتى حصلت في النادي الأهلي من قبل وسمعنا إن محمود الخطيب أو حسن حمدي قال إنه استلم الخزانة فاضية».
وتابع: «أي حد يجي جديد بيقول الكلمتين عشان الدنيا تهدى شوية، وياريت نقفل حته المجلس دي عشان لو اتكلمت هتكلم كلام كبير أوي».
وعن كواليس انتقال إمام عاشور إلى النادي الأهلي بعد عودته من الاحتراف الخارجي من الدنمارك، أكد عبدالحميد: «كنت حاسس إن إمام عاشور طالع للاحتراف في فريق ميتالاند الدنماركي «كوبري» للنادي للأهلي، ولما جيه يعيط ويمثل كنت عارف إنه عايز يروح الأهلي، وفضلنا نكسب فيه فلوس بدل ما يمشي مجانا زي زيزو».
وأوضح: «مجلس الزمالك السابق وافق على رحيل إمام عاشور للدنمارك للاستفادة المالية واحنا فاهمين الموضوع إن عايز يروح الأهلي، ففضلنا نكسب 3 مليون دولار أفضل من أن يمشي بشكل فري ومجاني، ويعمل زي زيزو ويقول والدي في المنيا ويقول لأ ده بيصيف».
واختتم نجم الزمالك السابق: «إمام عاشور راح نادي الزمالك لما كان راجع من الدنمارك عشان بيمثل، زي زيزو كان بيقول عمري ما هروح أي حته ونادي الزمالك ده بيتي على الرغم من أنه كان ماضي في الأهلي».
