أكد مصطفى يونس، نجم الأهلي السابق، أنه لم يدخل مقر النادي الأهلي منذ سنوات طويلة.
وقال مصطفى يونس، في تصريحات عبر إذاعة «أون سبورت اف ام»: «لم أتقابل مع محمود الخطيب، منذ سنوات طويلة».
وأضاف: «أنا مبدخلش النادي الأهلي، بقالي سنين كتيرة حوالي 8 سنين، أنا مبروحش النادي الأهلي بقالي كتير، النادي مبقاش بتاعنا».
وتابع: «ناس تانية اللي بتقعد في النادي الأهلي، مش الناس بتاعتنا، مش أنا لوحدي اللي مبروحش النادي الأهلي، أنا وجيل كامل معايا».
وواصل: «مبروحش النادي الأهلي، عشان مش عايز احتك بحد، أنا عصبي جدًًا، النادي الأهلي بيتي وخيره عليا وعلى أولادي، أنا عايش على حس النادي الأهلي ولكن أنا ليا عقلية تانية مبعرفش أسكت».
وأتم مصطفى يونس، تصريحاته قائلًا: «النادي الأهلي لم يوجه لي دعوة حضور حفل الاستاد الجديد، وفوجئت بالحفلة في التلفزيون، وكنت مبسوط لأن دي أمنية حياتنا يكون في استاد للأهلي، محدش يقدر يمسح تاريخي»، مضيفًا: «نفس اللي حصل مع عصام الحضري، عصام، ده تاريخ أعظم حارس في تاريخ مصر، ومجلس الإدارة موجود، ومسلموش عليه! ده السلام لله يا أخي، انتوا اللي بتعملوا كده».
