رد إبراهيم المنيسي، رئيس تحرير مجلة الأهلي ومقدم برنامج ملك وكتابة على قناة النادي، على تصريحات أحمد حسن، نجم الكرة المصرية، ومقدم برنامج «الكابتن»، والتي تحدث خلالها عن رغبة أليو ديانج في الرحيل.
وقال أحمد حسن في تصريحات تليفزيونية أن أليو ديانج، لاعب الأهلي، قرر الرحيل عن صفوف الفريق بسبب عدم مشاركته. وعلق المنيسي عبر قناته على منصة «يوتيوب»: «أحمد حسن قال إن ديانج قرر الرحيل عن الأهلي لعدم المشاركة مع المدير الفني ريبيرو».
وأضاف: «بعدها بيقول في الجملة اللي بعدها إنه بيفكر يمشي، يعني ما بين قرر وبعدها فكر يمشي، مؤكد إن أحمد حسن بخبراته الكبيرة مش معقول يكون فاهم إن أي لاعب مش هيلعب ماتش أو اثنين من حقه يمشي، وإلا كله يمشي».
وأكمل: «في كل الأحوال أتمنى من الإعلام بالذات الكباتن الكبار وفيهم ناس مرنت، يحاول يرسخوا مفاهيم إن الفريق في 25 لاعب ولو هحرض كل لاعب ميلعبش ماتش أو اثنين من حقه يمشي أنا بضرب استقرار أي فريق».
وتابع: «مش معقول احترفتوا ولعبتوا ويفوت عليكم تعززوا قيم الاحتراف، مش معقول إن البطولة شغالة والفريق عندنا مباراة مهمة وأنا بتكلم إن لاعب هيمشي وإنه أخد قرار وبعدين يقولك أصل عندي خبر».
وأكمل: «يا جماعة الإعلام مش كدة. لا ديانج هيكون صرح بكدة ولا حتى ينفع يتصدر من محترفينا ويبقى في قدر من المسؤولية».
وأردف: «هتشتغلوا لنا في الأزرق بقى، إنه لو تريزيجيه قعد احتياطي لـ بن شرقي يبقى عايز يمشي، ولو بن شرقي يبقى بن شرقي مش سعيد وعايز يمشي».
كما أضاف: «وهنفضل نشتغل في الشغلانة الزرقا دي لأن الفريق في عدد كبير من اللاعيبة، أتمنى الأمانة في الإعلام والوعي من محترفينا السابقين، المسوؤلية على الأقل، ولما تقول حاجة تكون حقيقية».
